Asaltu Malu Entre Grupu Arte Marsiais Iha Suku Madohi,PNTL Kaptura Ema Ida

EKIPA KONJUNTA SERVIS INFORMASAUN KAPTURA ONA AUTOR ASALTU MALU IHA SUKU MADOHI

Dili, 24 fevereiru 2022 (SRP) – Polisia Nasional Timor-Leste (PNTL) liu hosi Servisu Informasaun Polisia (SIP), Servisu Informasaun Militar (SIM) junta hamutuk ho Ekipa SNI (Servisu Nasional Intelizensia), kaptura ona suspeitu nain-1 ba kazu rama ambon no asaltu malu entre Grupu Arte Marsiais (GAM) ne’ebe akontese horikalan iha Aldeia Naroman, Suku Madohi, Postu-Administrativu Dom-Aleixo, Dili.

Kazu ne’e akontese horikalan tanba mosu provokasaun hodi rezulta asaltu malu entre GAM  no minute balu nia laran PNTL Esquadra Dom-Aleixo, SIP no SNI to’e kedas iha fatin akontesementu hodi halibur dadus, buka no duni autor sira konsege kaptura suspeitu ida ho naran inisial AfX tinan 17, hela iha Suku Madohi, husi GAM IKS no suspeitu lori Armas Brankas hanesan rama ambon oan 6 ho vizka ida ne’ebe maka suspeitu kaer hela iha liman laran bainhira ekipa kaptura.

Hafoin halo kapturasaun ekipa konunta entrega kedas suspeitu ba PNTL Esquadra Dom-Aleixo hodi lori mai eskuadra atu kontinua prosesu identifikasaun.

Relasiona ho kazu asaltu malu ne’e rezulta uma ida nia vidru janela hetan estragus no hakanek vitima ida ho naran inisial PdF tinan 29 hela iha Suku Madohi.

Oras ne’e daudaun suspeitu detein iha sela detensaun durante oras 72 hodi submete ba prosesu investigasaun.