PNTL Kaptura Tan Joven Ida Tamba Fasilita Membru PSHT Nain 5 Ba Sae Sintu Iha Indonesia
PNTL KAPTURA TAN JOVEN IDA NE’EBE FASILITA MEMBRU GAM NAIN 5 SAE SABUK IHA INDONEZIA
Dili, 09 agostu 2021 (SRP) - Polísia Nasionál Timor-Leste (PNTL) liuhusi Unidade Batallaun Ordem Publika (BOP) no Kompañia Operasaun Espesial (COE) kaptura tan membru Grupu Arte Marsiál (GAM) na’in 1 ne’ebe fasilita ona ema nain lima hakat ilegal fronteira terestre ba sae sabuk iha Indonézia.
“Bazeia ba orientasaun husi Komandante Jerál PNTL mai iha komandu UEP hodi reforsa liña fronteira ita koloka tan membru COE ho mós BOP servisu espesífiku no vizilánsia makas apoiu UPF hodi asegura liña fronteira hosi movimentu ilegal iha fronteira terrestre ninian no foin dader ne’e kaptura tan joven mane ida iha area fronteira ho naran inisial OdA, husi Aldeia Atus, Suku Gildapil Munisipiu Bobonaro ne’ebe mak fasilita ona ema nain 5 ba hodi sae sabuk iha Indonezia”, haktuir Komandante UEP, Superintendente Xefi Polisia Orlando Gomes ba jornalista sira iha nia knar fatin Bairo-Pite, ohin.
Orlando hateten, joven mane ne’e tama ilegal ba Indonezia iha loron 2 jullu 2021 ba sabuk, lori mos ema nain lima no nia mesak mak tama mai teritoriu nasional iha loron 6 agostu 2021 enkuantu nia maluk sira seluk sei iha hela Indonezia.
“Iha dia 7 agostu madrugada liubá BOP no COE halo kapturasaun ba ema nain 11 iha Suku Saburai hamutuk ho sidadaun Indonezia ida ne’ebé mak atu hakat fronteira ilegal ba Indonézia. Hafoin iha dia 8 agostu iha tuku 1 meiudia halo tán kapturasaun ba membru membru Grupu Arte Marsiál (GAM) na’in 1 iha Suku Memo hetan mós evidensia hanesan atributu arte marsiais husi PSHT ninian no ohin dader tuku 3 kaptura tan joven mane ida ne’ebe fasilita ona ema nain lima tama ilegal hodi hodi sae sabuk”, subliña.
Nia deklara, daudaun ne’e membru Grupu Arte Marsiais sira ne’e entrega ona ba Komandu PNTL Munisípiu Bobonaro hodi kontinua halo prosesu investigasaun hodi prosesa tuir lei ne’ebe vigora.
“Ita hatene katak moras ne’e agora dadaun aumenta ba bebeik liliu Covid variante delta ne’ebé komesa alastra ona iha ita-nia nasaun. Bazeia ba orientasaun husi komandu jerál ba ita –nia membru sira ne’ebé mak kolokadu ona iha fatin ne’ebá, sira iha estratéjia rasik servisu hamutuk entre PNTL BOP no COE atu bele halo kapturasaun ba ema sira ne'ebe maka tama ilegal”, nia hatutan.
Nia dehan, efetivus hosi BOP no COE sira sei servisu extraordinaria iha liña fronteira hotu hodi halo prevensaun ba pandemia Covid-19 variante foun ne’ebe hamate ona ema barak.
“Husi komandu UEP hato’o ona orientasaun ba COE no BOP servisu hamutuk ho komunidade sira aumezmu tempu husu ba komunidade sira iha fronteira atu servisu hamutuk ho membru sira hodi asegura no prevene ema labele hakur liu fronteira ho ilegalmente ba Indonézia, tanba ita hatene katak ita tenki asegura didi’ak ita-nia nasaun ne'ebe hari ho ran no ruin”, tenik tan.
Orlando haktuir, fronteiras terrestre ne’e hanesan fatin ne’e mak luan no presija apoiu hosi komunidade sira atu servisu hamutuk ho PNTL atu nune’e bele halo kapturasaun ba ema sira ne’ebé mak tama sai illegal
Autor : Liza
Editor : Fatinha
